Shtrimi i tubacionit të gazit fillon në mes të këtij viti
TAP ka lidhur kontratat e inxhinierisë, prokurimit dhe ndërtimit për tubacionin në pjesën tokësore me gjatësi prej rreth 760 km dhe diametër prej 1,2 m për seksionet e Greqisë dhe Shqipërisë. Lajmin e konfirmon vetë kompania TAP, e cila jep shpjegimin se e gjithë gjatësia është e ndarë në 5 lote, 2 në Shqipëri e 3 në Greqi.
Kompania franceze SPIECAPAG do të jetë ndërtuesja e gazsjellësit në 2 lotet shqiptare me gjatësi 215 kilometër nga hyrja në Bilishr deri në daljen në Topojë. Kjo kompani do të ndërtojë edhe 185 kilometr gazsjellës në Greqi. Ndërkohë pjesa tjetër në tokën greke do të ndërtohet nga një kompani vendase Avax dhe kompania italiane Bonati.
Kompania njofton se puna përgatitore do të fillojë menjëherë ndërkohë që ndërtimi në terren nis në mesin e vitit 2016.
Në shpjegimët e dhëna për kompanitë ndërtuese thuhet se kompania që do të ndërtojë në Shqipëri SPIECAPAG ka një historik të pashoq suksesi prej rreth një shekulli në ndërtimet e tubacioneve të gazit.
TAP-i do të transportojë gaz natyror nga fusha gjigante e Shah Denizit II, në Azerbajxhan, në Evropë. Tubacioni, i gjatë 878 km, do të lidhet me Gazsjellësin Trans Anatolian (TANAP) në kufirin turko-grek në Kipoi, duke kaluar përmes Greqisë dhe Shqipërisë dhe Detit Adriatik, përpara se të mbërrijë në brigjet e Italisë së Jugut. Rruga që përshkon TAP-i mund të lehtësojë furnizimin me gaz të disa vendeve të Evropës Juglindore, përfshirë Bullgarinë, Shqipërinë, Bosnjën dhe Hercegovinën, Malin e Zi, Kroacinë dhe të tjera.
