Një grup kriminal i përbërë nga shtetas bullgarë dhe shtetas me origjinë shqiptare në fushën e trafikut ndërkombëtar të lëndëve narkotike të forta është shkatërruar në Spanjë. Operacioni antidrogë është koduar “CROMANON”. Grupi kriminal merrej me shpërndarje heroine në Barcelonë dhe Tarragona.
Një shtetas shqiptar mjaft i njohur për policinë Spanjolle dyshohet se është drejtuesi i grupit kriminal. Gjatë operacionit u kontrollua dhe rezidenca e tij në Castelldefels.
Të arrestuarit janë, tre shtetas shqiptarë: A.Q, 47 vjeç, A.D, 41 vjeç, dhe E.Sh, 27 vjeç, si dhe një shtetas bullgar, P.D, 41 vjeç.
“Nga ky operacion janë konfiskuar 38 kg Heroinë e pastër, 8 kg Kokainë e pastër, dhe 50 kg përzierës. Gjithashtu është shkatërruar një laborator që përdorej nga organizata kriminale për të përzier lëndën narkotike, si dhe janë sekuestruar një armë me silenciator dhe një pajisje presimi.” informon Europol
Gjatë operacionit u krye kontrolli i disa banesave në Barcelonë, Gava, Rubi dhe Castelldefels. Gjithashu u konfiskuan një sasi e konsiderueshme parash dhe 10 mjete të shtrenjta, pajisje të ndryshme elektronike dhe shumë dokumenta. Operacion i përbashkët antidrogë ndërmjet Policisë Spanjolle dhe Policisë Shqiptare është koordinuar nga Zyra Kombëtare Europol Tirana.
