Edhe pse vetëm pak muaj pas emërimit si drejtoreshë e Operatorit të Shërbimit Shëndetësor, sot Suida Kuka u paralajmërua përmes një atentati me tritol që u organizua nga një person ende i paidentifikuar.
Kuka, më parë ka mbajtur pozicionin si drejtore e Njësisë Vendor e Kujdesit Shëndetësor në Shkodër dhe në muajin maj ishte emëruar drejtore e Operatorit të Kujdesit Shëndetësor rajoni Verior! Post që më herët u mbajt nga Astrit Beci.
Ajo nuk ka një angazhim të gjatë në jetën aktive politike. Drejtoria rajonale e Shkodrës e operatorit të Shërbimit të Kujdesit Shëndetësor, të cilën drejton Kuka, ka nën varësinë të saj njësitë e ofrimit direkt të shërbimeve, të cilat përfshijnë njësitë vendore të kujdesit shëndetësor, qendrat shëndetësore, klinikat dhe institucionet shëndetësore me shtretër, spitalet.
Fatmirësisht, lënda plasëse u pikas para se Kuka të hipte në makinë dhe për pasojë nuk ka shpërthyer e nuk është realizuar atentati. Forcat xheniere e shpërthyen në mënyrë të kontrolluar, por nuk dihet ende nëse arsyeja e përgatitjes së këtij atentati ka të bëjë me detyrën e Kukës apo me ndonjë konflikt personal që mund të ketë pasur e reja.
Ajo ka deklaruar se për ngjarjen u informua nga policia, teksa zhvillimet më pas i ka ndjekur nga media. Policia ka njoftuar dhe drejtoreshën për ngjarjen, duke i kërkuar që të largohet bashkë me stafin nga institucioni.
Kompetencat e Suida Kukës
Planifikojnë nevojat për shërbime të kujdesit shëndetësor në nivel rajoni;
b) Garantojnë që shërbimet shëndetësore të ofrohen brenda standardeve, në kohë, brenda buxhetit dhe në cilësinë e kërkuar, në territorin që mbulojnë;
c) Koordinojnë, monitorojnë dhe sigurojnë ofrimin e shërbimeve të kujdesit shëndetësor në nivel rajoni, pranë vendbanimit, për të gjithë qytetarët;
ç) Kryejnë procedurat për menaxhimin e burimeve njerëzore në sistemin shëndetësor parësor, shëndetin publik dhe spitalor (planifikimi i nevojave, rekrutimi, trajnimi etj.) për rajonin përkatës;
d) Bashkëpunojnë me Fondin e Sigurimit të Detyrueshëm të Kujdesit Shëndetësor (FSDKSH) për çështje të lidhura me financimin e kujdesit shëndetësor;
dh) Bashkërendojnë punën ndërmjet të gjitha strukturave që kanë në varësi.
Kjo është makina tip “Range Rover” në pronësi të Suida Kukës, poshtë së cilës ishte vendosur një pako me lëndë plasëse. Ngjarja ndodhi pasdite e sotme në lagjen “Vojo Kushi” në Shkodër.
