Konsumi në krizë, inflacioni i shkurtit më poshtë se në janar 2003
Shqiptarët blejnë më pak, ushqehen më pak, vishen më pak dhe shkojnë më rrallë te mjeku. Ky është përkthimi që mund ti bëhet publikimit më të fundit të INSTAT për inflacionin e muajit shkurt. Me një ndryshim vjetor krejt të papërfillshëm me vetëm 0,2 për qind, inflacioni është poshtë nivelit të janarit të vitit 2003.
Me këto të dhëna është e qartë se ekonomia po rrëshqet drejt deflacionit dhe të gjithë përpjekjet për të ndikuar në përmirësimin e saj praktikisht kanë patur efekt zero.
Nga analiza e të dhënave të INSTAT, rënia e çmimeve ka ardhur si nga krahu i ofertës dhe i kërkesës. Por sinjali më i qartë i rrezikut është rënia e cmimeve të ushqimeve. INSTAT raportoi se, çmimet e nëngrupit “qumësht, djathë e vezë” u ulën me 6,1 %, pasuar nga nëngrupet “bukë e drithëra” me 2,4 %, dhe mishi me 1,3 %, etj. Rënia është e madhe edhe po ta krahasojmë me një muaj më parë. Krahasuar me janarin grupi “Ushqime dhe pije alkoolike” ka rënë me 3,3 %. Por rënie kanë shënuar edhe grupe të tjera përvec ushqimeve. INSTAT raporton se shërbimet e transportit kanë rënë me 4,1 % me bazë vjetore, veshjet e këpucët me 3,4 %, shëndeti me 2,2 %. Më rënie janë energjia, lëndët djegëse dhe qiratë. Pavarësisht sinjalit që mund të sjellin, rritje kanë regjistruar vetëm cmimet e hoteleve, kafeneve e restoranteve.
