Nga Mentor Kikia
Debati i madh është se kush e ka përgjegjësinë për grabitjen në aeroport. Nga gardhi e brenda e ka TIA, domethënë kompania private e sigurisë që ka kontraktuar ajo ICTS. Nga gardhi e jashtë e ka policia e shtetit. Tani, nëse grabitësi hyn nga jashtë-brenda, atëherë duhej ta kapte më parë policia, se ICST nuk ka armë. Në këtë rast, ata kanë hyrë një herë nga jashtë-brenda, pastaj kanë bërë një xhiro nëpër pistë, kanë kontrolluar avionët, nëse ishin në rregull me oraret dhe pastaj kanë bërë grabitjen, duke ecuar nga brenda-jashtë. Kush e ka fajin këtu? Asnjeri them unë. Edhe TIA, me të drejtë pyeti? Po sikur të na hedhin një shishe me benzinë, nga jashtë-brenda, kush e ka përgjegjësinë? Ndërsa unë po pyes: Po sikur të marrin peng, apo të sulmojnë një avion nga brenda-jashtë? Po sikur të futen kamikazë të maskuar si punëtorë bagazhesh apo roje private, nga jashtë-brenda, e pastaj të sulmojnë nga brenda-jashtë me të gjitha avionët kamikazë? Kush do të ndërhyjë, sepse rojet e ICST nuk kanë armë?
Ja pra, e shikoni që asnjëri s’ka faj. Pikërisht, meqë s’kanë faj, edhe drejtorët e TIA dhe ICTS, as e kanë prishur terezinë fare për çfarë ndodhi në Rinas, por vazhdojnë pushimet.
Unë habitem për një gjë. Si ka mundësi që këtu bëhen kaq pak grabitje? Si ka mundësi që nuk e marrin të gjithë shtetin e ta fusin në thes? Po si është e mundur që i gjithë shteti është dhënë me PPP (koncesion). Edhe bankat, edhe ministritë, edhe magazinat e rezervave të shtetit, edhe aeroporti, edhe portet, edhe KQZ-ja, edhe biblioteka kombëtare, arkivat, muzetë, universitetet, bashkitë… gjithçka i është lënë për ruajtje policive private. Po a e dini çfarë janë policët privatë? Ca njerëz pa asnjë përgatije, ca me bark të madh që s’u mbërthehen pantallonat, e ca aq të dobët sa u prek rripi shtyllën kurrizore. Këta rregullojnë turnet, duke bërë 24 orë shërbim që të nxjerrin tre ditë pushim për të bërë ndonjë punë në shtëpi dhe shumicën e kohës flenë në shërbim pastaj. Këta paguhen 20 mijë lekë në muaj dhe ata më me fat kanë marrë pagesën e marsit tani. Këta bashkëpunojnë për të grabitur jo 1 milion euro, por edhe 1 mijë euro.
Këto janë pasojat, kur shteti dorëzon gjithçka tek privatët, me ca standarte skandaloze, ku gjithkush zhvat ç’të mundë. Kështu, është gjithandej, por duhet të plasë bomba për të mësuar se si është e vërteta.
