Prej tre ditësh maturantët kanë protestuar përballë Ministrisë së Arsimit lidhur me pyetjet absurde në testin e Gjuhë-Letërsisë, të cilat siç ata shprehen ishin jashtë programit.
Një nga pyetjet që mori edhe më shumë vëmendje, për të cilën të gjithë ranë dakord, që ishte pakuptim, ishte pyetja me Turin dhe varkën e tij.
Por duket se Besa Shahini kishte menduar një mënyrë më të thjesht për të testuar gjimnazistët, duke e përafruar tezën me atë të testit të gjuhës angleze në Cambridge, ku një nga pyetjet është shumë e ngjashme me pyetjen e Turit, për mos të thënë e njëjtë.
Ky rast është denoncuar nga pedagogia Edlira Gjoni.
Postimi i plotë
Shikoni faqet 8 dhe 9 të këtij testi, te pjesa Reading! Turi duhet të jetë shoku i Danit në këtë tekst të përafërt. Alternativat e logjika ngjasojnë. Po kërkoja të plotin, se kuptohet lehtë që pyetja për maturantët tanë është e marrë e gatshme dhe e përkthyer, në pjesë si kjo.
Po edhe nga Cambridge në qoftë marrë, me leje e me liçencë, si u bëka testimi i shqipes sipas stilit, mendimit e leximit të anglishtes?
Kur t’u mësoni e testoni fëmijëve anglisht, po, përdorini këto metoda. Ama shqipes nuk i bën ky kostum!
Cili është komisioni që e hartoi? Po me Katedrën e Gjuhës Shqipe, jeni konsultuar?
Pse duhen pyetje me shqipe e kontekst të sforcuar barkash në lumë? Ç’i gjeti pyetjet për të zbërthyer fjali si kjo më poshtë:
“Meqenëse jeta dhe siguria e secilit është e lidhur me fatin e të gjithë atyre që, së bashku, formojnë kombin, do të na donte shpirti që çdokush të sakrifikojë pesë minuta në njëzet e katër orë dhe të hetojë nga thellësi e vetes së tij se ç’shërbim ka bërë për shoqërinë dhe ç’të mirë mund t’i bëjë kësaj shoqërie që e quajmë komb, e ky do të ishte një ushqim shpirtëror për ne e për të afërmit tanë”
Zbërthim i logjikës, tekstit e pjesëve të nënrenditura të kësaj fjalie të M. Frashërit. Pse të mos vënë këtë fjali për përgjigje alternativash, nëse duhen! Po pse të zhduket nga qarkullimi kjo metodë e testimit të shqipes? Një fjali e ngjashme më ka rënë në një provim gjuhësie në periudhën mes maturës dhe universitetit. Nuk më shqitet nga mendja! Më ka bërë ta dua shqipen po aq fort sa veten.
Fjalia e Turit nuk e ka këtë efekt. As pyetjet rreth saj.
Do themi: “Ç’na duhen pjesët e nënrenditura”?
Për të njëjtën arsye që na duhet kimia, matematika, shkolla e gjithë: të na stërvisë logjikën e të mos na lejojë të bëjmë gabime në shqip!
Gjuha jonë testohet me metoda, tekste dhe kontekste shqip!
Hartuesit e Cambridge e kanë bërë punën e tyre për veten, jo për ne. E kanë bërë duke pasur në themel të logjikës shkruese e testuese gjuhën e tyre, jo tonën.
Nuk matet uji me vizore. As portokallet me litra. As shqipja pra, nuk mund të testohet me metodat që mendoni ju se janë moderne!
E kush janë ata që merrin përsipër të ndryshojnë thelbësisht mënyrën e trajtimit të saj?
Gjuha, flamuri, himni, janë simbole, jo fushë eksperimentale!
Ndaleni këtë masakër, se është njëlloj si t’ia vësh flakën vetë shtëpisë, nga brenda! E të mburresh që di të përdorësh çakmak, jo shkrepëse!
https://www.cambridge-exams.ch/sites/default/files/pet_s_reading_and_writing.pdf
Më poshtë mund të ndiqni fotot e dy testimeve
