Situatë alarmante në Elbasan, tymi dhe aroma e rëndë mbulojnë zonën industriale –

Sipas dëshmive të banorëve, në orët e para të ditës janë shfaqur shtëllunga të dendura tymi që kanë pushtuar zonën përreth, të shoqëruara me një aromë të padurueshme që është përhapur në të gjitha drejtimet. Situata ka krijuar shqetësim të madh, sidomos për familjet me fëmijë dhe të moshuar, të cilët raportojnë vështirësi në frymëmarrje dhe irritim të fortë nga era e rëndë.

Banorët kërkojnë ndërhyrje të menjëhershme nga institucionet përgjegjëse për të identifikuar shkakun e kësaj ndotjeje dhe për të marrë masa urgjente, përpara se situata të përshkallëzohet më tej. Ata theksojnë se episode të tilla janë bërë të përsëritura dhe rrezikojnë seriozisht shëndetin e komunitetit.