Ish-deputetja e PD-së, Grida Duma ka komentuar mënyrën se si po menaxhohet situata pas tërmetit të 26 nëntorit.
E ftuar në emisionin “Kjo Javë”, Duma deklaroi se pas tërmetit të 26 nëntorit, në ditët e para Durrësi pati një ikje masive, një eksod të dytë. Ndër të tjera ish deputetja e PD tha se buxheti i shtetit nuk e përballon dot këtë tragjedi dhe se zgjidhjen për situatën e sheh vetëm tek ndihmat nga Bashkimi Europian.
“Që të nesërmen e tërmetit kam qenë në terren. Ditët e para ka qenë një shkretëtirë shumë e trishtë. Ikja pas dy ditëve, aty ishte një lloj eksodi i dytë. E mbaj mend eksodin e parë me anije, ky ishte i dyti. E trishtë dhe e dhimbshme. Kush ka kaluar në zonat ku banesat kanë rënë është shumë e tmerrshme. Ditë të kobshme kanë qenë. Ende sot nuk ka asnjë siguri. Një nga gjërat që pak është thënë ka qenë ndihma e munguar psikologjike. Kapacitetet duhet të vinin nga të gjitha vendet. Sidomos asistenca për fëmijët. Ajo që shikoj në tërësi sot është një negativitet i madh kudo. A është e pranueshme plotësisht, a është e kurueshme po, a po kurohet, jo? Më vjen keq ta nis kështu. Kisha vendosur që çështjen e Edi Ramës se si po qeveris ta quaja çështje të zhdukur, ishte një çështje që shqiptarët e shikonin përditë”, ka thënë Duma.
