Lidhur me skandalin me sigurinë ushqimore, kreu i qeverisë, Edi Rama tha se deri tani janë gjobitur ata që kanë shkaktuar këto dëme, por tashmë masat do të jenë më të ashpra, deri në burgosjen e tyre.
Gjatë mbledhjes së Grupit Parlamentar të PS, Rama u shpreh se masa e dënimit do të jetë burg deri në 10 vjet.
“Masa e dënimit do të jetë burg deri në 10 vjet. E njëjta gjë për prodhimet ushqimore jashtë afatit të përdorimit. Nuk ia ka borxh asnjë familje kësaj qeverie që të rri e të bëjë sehir dhe nuk sjell asnjë zgjidhje sistemi i punës duke i gjëmuar nga pas tek për tek duke negociuar gjoba me individë e subjekte të tilla. Mashtrimi me produktet ushqimore hyn në veprat penale, zëvendësimi i shenjave të sigurisë, që është një tjetër lojë e zhvilluar hyn në veprat penale, dhe duke e adresuar këtë problem kaq jetik e kërcënuar për psikologjinë e vendit në vetëdijen se jo vetëm që nuk bëhet fjalë për të gjitha produktet, por për një pjesë të vogël të tyre, ne përmbushim një angazhim si rezultat i një reflektimi mbi një eksperiencë 30 vjeçare të dështuar”, tha Rama.
