Ngjarja që tronditi vendin ku një 7-vjeçare u godit me skaf teksa po qëndronte në breg të detit, nuk i ka ndalur disa qytetarë që të përdorin mjetet lundruese, aq më tepër në zonën e kufizuar siç është ajo e Potamit në Himarë.
Policia Kufitare e Vlorës ka bllokuar edhe 3 mjete të tjera lundruese, 1 gomone dhe 2 “Jet ski”.
Po ashtu është gjobitur me 100.000 lekë të rinj, pronari i njërit prej mjeteve lundruese shtetasi V. P., 50 vjeç, pasi nuk respektoi zonën e kufizuar për mjetet lundruese, në plazhin e Potamit, Himarë ku ndodhi dhe tragjedia.
Gjithashtu, në vijim të kontrollove, në Himarë, u bë bllokimi dhe i 2 mjeteve të tjera lundruese “Jet ski”, në pronësi të shtetasit F. B., me qëllim kontrollin për dokumentacion, si dhe për verifikim nga Seksioni i Trafiqeve në DVP Vlorë.
