Tirana u trondit mbrëmjen e djeshme nga breshëritë e kallashnikovëve që lanë pas dy viktima në lagjen “Astir”. Plumbat ndanë nga jeta Erigers Mihasin, 32 vjeç dhe mikun e tij Armand Dumani, 26 vjeç, të cilët po udhëtonin me një “Audi A7”.
Gazetari i ABC, Ermal Vija ka raportuar detajet e këtij atentati mafioz, ku rezulton që autorët e sulmit kanë ditur çdo lëvizje të shënjestrave të tyre. Mësohet se autorët i kanë ndjekur nga pas viktimat për një kohë të gjatë. Mihasi dhe Dumani ishin ndaluar për kontroll rutinë nga policia tek Sheshi “Nënë Tereza” dhe më pas ishin lënë të lirë, por kjo liri rezultoi vetëm disa minutëshe, pasi u ekzekutuan disa kilometra më larg.
Kamerat e sigurisë kanë filmuar ngjarjen në Astir, ku është kapur edhe makina e autorëve. Fillimisht, makina e autorëve “Toyota” e vjedhur me Greqi dhe me targa të vjedhura në Tiranë, shfaqet ndërsa ndjek nga pas “Audin” luksoz tek Pallati me Shigjeta. Në pak minuta makinat shfaqen në Astir, ku pranë një semafori, fillimisht autorët hapin zjarr nga pas “Audit”, kurse më pas u dalin në krah duke shtënë të tërë karikatorin. Për pasojë dy të rinjtë kanë mbetur të vdekur në vend.
Mësohet se Mihasi, i cili dyshohet të ishte shënjestra kryesore e atentatit, kishte pak kohë që ishte kthyer nga Gjermania, ndërsa autorët e kanë ditur këtë fakt dhe kanë realizuar planin për eliminimin e tij.
Makina tip “Toyota” e autorëve u gjet e shkrumbuar në afërsi të Thumanës, ku brenda saj u gjetën edhe dy kallashnikovët që supozohet të jenë përdorur në vrasjen e dy të rinjve. Deri më tani nuk ka patur gjurmë të autorëve, të cilët dyshohet se mund të jenë me vrasës profesionistë me pagesë.
Pista kryesore që po hetohet është ajo e përplasjes mes bandave kriminale. Një tjetër pistë hetimi është edhe përfshirja e emrit të Erigers Mihasi në një ngjarje kriminale të ndodhur disa kohë më parë në Laç, ku u vra ish-polici Xhelal Reçi. Mihasi ishte një nga personat e dyshuar si të përfshirë në ngjarje, por në atë kohë ky i fundit rezultoi të ishte në Gjermani.
