Policia: Arrestimi me urdhër të Prokurorisë për Krimet e Rënda
Emiljano Shullazi, personi me precedentë të shumtë penalë që shpesh është bërë objekt i akuzave politike mes ish-qeverisë së djathtë dhe mazhorancës aktuale të drejtuar nga Edi Rama, ra në prangat e policisë mbrëmjen e së shtunës në Tiranë, në një operacion që fillimisht u shfaq mjaft diskret nga ana e uniformave blu.
Një ditë më pas u bë e ditur, se vënia e tij në pranga ishte bërë me urdhër arresti të Prokurorisë për Krimet e Rënda e bashkë me të ishin arrestuar edhe kushëriri i tij Blerim Shullazi dhe shoku i ngushtë Gilmando Dani. Po ashtu u zbardhën zyrtarisht edhe një sërë akuzash të ngritura ndaj tyre “Shtrëngimi me anë të kanosjes ose dhunës për dhënien e pasurisë”, “Shkatërrim i pronës me eksploziv”, “Prodhimi dhe mbajtja pa leje e armëve luftarake dhe e municionit” dhe “Grup i strukturuar kriminal”.
Ndërsa arrestimi i Emiljano Shullazit ndodhi pak orë pas akuzave publike të ish-kryeministrit Sali Berisha se kish kërcënuar kandidatin për rektor të Universitetit të Tiranës Mynyr Koni për tu tërhequr nga gara, policia nuk e përmendi në deklaratën e saj zyrtare akuzën për kanosjen e Konit.
Në komunikatë policia i referohet një akuzë konkrete, atë “shkatërrimit të pronës me eksploziv”, një formë kanosje kjo për të përfituar para nga një biznezmen. Express mëson se bëhet fjalë për biznesmenin Arjan Zika, i cili rreth 3 muaj më parë ka kallëzuar se është kërcënuar nga Emiljano Shullazi për një parking 1.200 metra katrorë në Tiranë. Top Channel ka zbardhur dëshminë e biznesmenit dhënë në Prokurorinë për Krimet e Rënda: “Emiliano Shullazi më kërkoi takim. Dikush erdhi e më tha se Emiliano po të pret ta takosh. Kohë më parë kam blerë një sipërfaqe parkingu prej 1.200 metrash katrorë, Emiliano më tha ose blije sërish me çmimin e tregut të sotëm, ndryshe do të të vras. E kam takuar 4 herë Shullazin dhe nuk pranova”.
Por duket se kundërshtia që biznesmeni i ka bërë “urdhrit” të Shullazit, solli edhe një ngjarje të pakëndshme për të. Në 13 mars të këtij viti në dyqanin e tij ndodhi një shpërthim me lëndë plasëse. Pas kallëzimit, Arjan Zika është larguar nga Shqipëria për shkak të frikës.
Episodi tjetër, për të cilin dyshohet Shullazi, ka lidhje me ish-hotel “Vollga”, në Durrës, që dyshohet se përmes kërcënimeve mund t’i jetë dhuruar Shullazit nga një shtetas shqiptar, raporton Top Channel. Janë të paqarta procedurat e ndjekura për kalimin e ish-hotelit nga një shtetas arab te shtetasi shqiptar, e më pas tek i dyshuari Shullazi.
Prokuroria pohon se, ndërkohë disponon edhe 4 informacione të përcjella nga policia e Shërbimi Informativ Shtetëror, për gjobëvënie ndaj 4 biznesmenëve të ndërtimit, të cilët mësohet se e kanë paguar gjobën e kërkuar. Por ata nuk kanë pranuar të kryejnë kallëzime.
Shullazi është shoqëruar e ndaluar për armëmbajtje pa leje, ndërkohë që akuza më e rëndë, që i ka dhënë atij fajësi me 7 vite burg, ka lidhje me çështje droge.
