Gjykata e Posaçme shtyn seancën e radhës të përballjes së deputetes Grida Duma me kryebashkiakun e Tiranës, Erion Veliaj. Ishte Veliaj ai i cili nuk ishte prezent në seancë, ndërkohë që Duma u paraqit së bashku me avokatin mbrojtës.
Përballë gazetarëve, Duma u shpreh se do jetë e pranishme në çdo seancë, ndërkohë që tha se kjo gjë nuk do të realizohet nga ana e Veliajt. Duma tregoi se ka qënë kryebashkiaku ai i cili ka kërkuar që seanca të shtyhej.
“Nuk ka për t’u paraqitur, se përballja me të vërtetën e ka të vështirë. Do të vijojë nuk dhamë dakordësi për pajtimin. Ju bëj me dije se nuk është më çështja ime personale, herë pas here është politike. E vërteta duhet të kthehet në institucion. Gënjejmë, premtojmë, japim mashtrime dhe ia mpimë shqisat të gjithëve se çdo gjë e gënjeshtër fiton në këtë vend. Më takon mua të bëjë një betejë. Kjo betejë nis nga vlera e fjalës, vërtetësia e saj. Kur njeriu beson fjalën, vepron mbi atë. Ata që besojnë gënjeshtra, bën veprimin e gabuar. Ata që kanë lindur në liri, e dinë peshën e saj”.
Kujtojmë se padia për “shpifje”, e bërë nga deputetja e PD, ka lidhje me deklaratat e Veliajt, i cili e ka cilësuar deputeten si trafikante apartamentesh dhe të dënuar për “mashtrim”. Këto deklarata, kryetari i Bashkisë Tiranë i ka bërë pas akuzave të ngritura nga Partia Demokratike ndaj tij për lidhje me mafien italiane.