Deputetja e PD, Albana Vokshi është paraqitur ditën e sotme në gjykatën e Tiranës për seancën kundër ministres së Arsimit Evis Kushi. Kujtojmë se më herët ministrja e Arsimit e ka paditur Vokshin për shpifje. Kjo e fundit ka akuzuar Kushin për abuzim në provimet e maturës, duke vendosur nota më të larta për maturantët, vetëm që këta të mos ngriheshin në protestë. Por, seanca e sotme është shtyrë dhe në një prononcim për mediat Vokshi tha se gjyqi është shtyrë për në shtator, për shkak të bojkotit të avokatëve. Ndërsa tha se nuk do ta lërë me kaq këtë çështje, duke akuzuar Kushin dhe Ramën se i kërcënojnë mësuesit për vendin e punës që të bëhen pjesë e patronazhistëve.
“Sot gjyqi nuk mundi të zhvillohej, për shkak të ngarkesës që ka kjo gjykatë pas grevës së avokatëve. Është shtyrë për në shtator, dhe unë do paraqitem personalisht sepse pavarësisht përpjekjeve të Ramës për të na mbyllur gojën ne do jemi zëri i mësuesve, zëri i prindërve dhe i nxënësve. Arsimi sot është degraduar. Vetëm një kryeministër si Rama mund ta çonte arsimin në këtë pikë. Ai po vërteton çdo ditë se është armik i dijes. Kurrë mësuesit nuk janë kërcënuar dhe keqtrajtuar nëse nuk bëjnë rolin e patronazhistit. Sot arsimi është kthyer në një celulë të patronazhistëve”, u shpreh ajo. Ndërsa kërkoi që Kushi të largohet nga drejtimi i arsimit sepse po e shkatërron atë.
