Nuk ka atmosferë festive në Shkodër edhe pse gjithë bota po flet për shenjtërimin e shqiptares së madhe Gonxhe Bojaxhi e cila jetoi disa vite në këtë banesë në lagjen Badra të këtij qyteti. Megjithatë ka shumë shkodranë sot në Romë që nesër marrin pjesë në shenjtërimin e shqiptares së madhe
Nuk duket asnjë atmosferë festive në Shkodër këto ditë të shenjtërimit të Nënë Terezës. Bashkia Shkodër nuk dihet nëse ka organizuar ndonjë aktivitet me këtë rast. Në qytetin e Shkodrës, në lagjen Badra ndodhet shtëpia ku jetoi familja e shqiptares së madhe Gonxhe Bojaxhi. Shtëpia Muze është dhuruar nga ish-pronarët duke u vënë në dispozicion si muze dhe është restauruar nga biznesmeni Gjergj Liqejza, i cili ka qënë edhe prefekt i qarkut Shkodër. Liqejza ka ndjekur gjithë procedurat për të finalizuar shtëpinë muze të Nënë Terezës ku ndodhen objekte e fotografi interesante në shtëpinë ku jetoi shqiptarja e madhe Gonxhe Bojaxhi.
Këto ditë që shenjtërohet në Vatikan Nënë Tereza, në Shkodër me sa duket ka një festë të Birrës. Liqejza i bën thirrje me ironi zyrtarëve që organizojnë këto festime që pasi të përfundojnë festën me birra e qofte, të kalojnë tek kjo shtëpi muze se ka vlera e duhet që të vizitohet në këtë ditë të shënuar për kombin shqiptarë, kur shenjtërohet Nënë Tereza. Bashkë me shumë shkodranë të tjerë, Gjergj Liqejza ndodhet në Romë, për të ndjekur ceremoninë e shenjtërimit të Nënë Terezës. Në profilin e tij në Facebook ai ka publikuar foto të portës së shtëpisë së Nënë Terezës në Shkodër.
“Po mendoj nëse dikush në Shkodër e din që familja Të Madhes Gonxhe Bojaxhi për disa vjet ka jetue në lagjen Badra në nji shpi të thjeshtë që asht vue në dispozicion nga pronarët për tu shndërrue në “muze”…me dokumenta e foto interesante të familjes Bojaxhi.. Meqë në Shkodër çuditërisht nuk shoh ndonji “atmosferë me rastin Shenjtërimit të Nanë Terezës …ju kishe sygjerue që mbas çasteve të “gzueshme” të festës së birrës ..të vizitojnë ktë shpi unikale në Shqipni….” shkruan Liqejza në facebook.
