Një 30-vjeçar shqiptar është plagosur 7 herë me thikë në ditën e Krishtlindjes në Greqi. Sipas mediave greke ai rrezikoi të humbte jetën, por gjithsesi nuk ka bashkëpunuar me autoritetet për të zbardhur rrethanat e ngjarjes së ndodhur në Therissos, Heraklion.
Policia raportoi se një grup njerëzish u përleshën me njëri-tjetrin dhe njëri prej tyre sulmoi të riun shqiptar dhe menjëherë u largua nga vendngjarja.
I plagosuri kishte humbur shumë gjak dhe u mor menjëherë me ambulancë për t’u dërguar në spitalin e Venizelios. Atje iu nënshtrua një ndërhyrje kirurgjikale por gjendja e tij vijon të mbetet e rëndë.
Ai nuk pranoi të përmendte asnjë emër për të çuar në zbulimin e agresorit që e qëlloi me thikë. Policia po përpiqet të identifikojë autorin nga dëshmitë dhe materialet filmike nga kamerat në zonë.
