Javën e kaluar karabinierët italianë kanë vënë në pranga të riun shqiptar David Rebeshi i akuzuar për zhvatje të rëndë me mënyra mafioze.
Së bashku me Rebeshin u arrestuan edhe tre të rinj të tjerë shqiptarë pasi tentuan t’i merrnin disa mijëra euro një sipërmarrësi në Tuscania, në provincën e Viterbos, viktimë edhe më parë e grupit kriminal të drejtuar nga Ismail Rebeshi e Giuseppe Trovato.
Pak para se të arrestohej, Davidi i telefonon disa herë viktimës dhe i kërkon paratë. E kërcënon me vdekje dhe me hedhje në erë të lokalit.
Sipërmarrësi reziston pak, por kur luan kartën e vëllait, edhe rezistenca më e fortë bie. “Telefonoje, jepi”, i ulërin Davidi në telefon. “Thuaji që duhet të falënderojë Zotin, po të ishte jashtë do ishte më keq. Atij i pëlqen të hajë gjakun e të tjerëve”. Pastaj paralajmërimi final: “Nuk luhet me paratë e të tjerëve”.
Për gjyqtaren Savina Poli, e cila firmosi arrestin me burg, nuk kishte dyshime që ai i referohej vëllait, në burg prej rreth një viti. Për më tepër, Ismali është vënë në izolom pasi që nga burgu vazhdonte të drejtonte afaret e tij.
Më 5 shkurt, nga burgu i Cuneos, i dërgonte një mesazh Davidit, ku i shprehte shumë dyshime për drejtuesin e ri të kompanisë së tij të shit-blerjeve të makinave. E ngarkon me detyrën për të krijuar një kompani të re, me kunatën e tij. Kompani që u krijua dhe që bëri që shoqja e Ismailit dhe kunata të përfundonin nën hetim. Ajo që për hetuesit është e qartë është që mënyra e veprimit, e dhunshme dhe mafioze, vazhdon edhe pas arrestimit të Rebeshit.
