Klima e tensionuar politike në Maqedoninë e Veriut duket se po reflektohet gjithnjë e më shumë edhe në arenën sportive. Një incident i rëndë është regjistruar në ndeshjen e zhvilluar dy ditë më parë mes FK Vardar dhe FK Tikveš, e përfunduar me rezultatin 7-0 në kuadër të kampionatit vendas.
Gjatë sfidës, tifogrupi ultras i Vardarit, i njohur si “Komiti”, është dëgjuar duke brohoritur në kor thirrje me përmbajtje të rëndë antishqiptare, përfshirë sloganin: “Shqiptari i vdekur është shqiptari i mirë”. Pamjet e këtyre thirrjeve u publikuan fillimisht në një faqe online, por u fshinë pas rreth 30 minutash.
Ngjarja ka rikthyer në vëmendje një problem të përsëritur në stadiumet e vendit fqinj, ku retorika nacionaliste dhe diskriminuese shfaqet herë pas here. Këtë herë, incidenti vjen në një moment të ndjeshëm, pas protestave të studentëve shqiptarë që kërkojnë të drejtën për të zhvilluar provimet në gjuhën shqipe.
Lidhur me ngjarjen, Ministria e Punëve të Brendshme e Maqedonisë së Veriut ka konfirmuar se rasti përbën vepër penale “dhunë dhe sjellje e pahijshme në ndeshje sportive”. Sipas legjislacionit në fuqi, për persona fizikë parashikohen gjoba nga 600 deri në 1000 euro, ndërsa klubi mund të penalizohet me 1500 deri në 5000 euro në rast se nuk ndërmerr masa për të parandaluar sjellje të tilla.
Ngjarje të tilla ngrenë shqetësime serioze mbi ndikimin e tensioneve politike dhe etnike në sport, një hapësirë që teorikisht duhet të bashkojë, por që në raste të tilla shndërrohet në arenë përçarjeje.
