Prej fillimit të muajit korrik dhe deri ditëve të fundit, autoritetet britanike kanë folur vazhdimisht në lidhje me emigrantët që mbërrijnë në brigjet e tyre me anë të kanalit të La Manshit. Madje, në fokusin kryesor kanë qenë shtetasit shqiptarë, të cilët për një periudhë kohe u kthyen në kryefjalën e mediave, politikës dhe sistemit të drejtësisë. Madje, bënë që të kërkohej ndërhyrje për të ndaluar shqiptarët edhe nga Franca, ndërkohë që iu kërkua shtetit shqiptar të niste sanksionet e rënda kundër shtetasve shqiptarë, që përdornin gomonet për të mbërritur në Angli nëpërmjet kanalit.
Shifrat çdo ditë rriteshin, sidomos të shtetasve shqiptarë që kohëve të fundit synuan ikjen nga Shqipëria, duke shfrytëzuar konkretisht uljen e çmimit duke u krahasuar me një vit më parë.
Edhe pse trafikantët, kryesisht shqiptarët, që u tha se kanë një rol të dorës së dytë ose të tretë në atë trafik, të gjithë punën e tyre e reklamonin në rrjetet sociale, duke krijuar jo vetëm besueshmëri, por madje edhe siguri se njerëzit që donin të shkonin në Angli janë të sigurt që mbërrijnë shëndoshë e mirë. Shifrat në çdo nisje, kryesisht të premteve për të mbërritur në shtunën paradite dhe orëve të mesditës,
flasin për dominim të shtetasve shqiptarë që kanë marrë edhe familjet e tyre dhe janë larguar nga vendi i tyre. Autoritetet britanike bënë me dije se çdo muaj shifrat e shqiptarëve që kërkojnë azil i kalojnë 1500 persona, ndërkohë që ditëve të fundit u tha se ulja e çmimit krijoi një dyndje të shqiptarëve që ikin në drejtim të Britanisë. Mediat atje tregojnë se janë të paktën 9 mijë shqiptarë që kanë hyrë kohëve të fundit në Britaninë e Madhe. Ata i kërkuan ministrit të Brendshëm që të niste në drejtim të Doverit një grup efektivësh policie për të funksionuar si skuadër e përbashkët me atë angleze për të pritur në breg shqiptarët që ikin për një jetë më të mirë atje. Aty pretendohet se do të bëhet edhe verifikimi i tyre dhe të gjithë emigruesit shqiptarë që rezultojnë me precedentë kriminal duhet të kthehen në Shqipëri dhe madje edhe të dënohen me 4 vite burg. Megjithatë, asnjë lloj penalizimi dhe as etiketimi nuk i ka ndaluar shqiptarët të marrin rrugën pa kthim të emigrimit kohëve të fundit duke krijuar një shqetësim që i kaloi kufijtë jo vetëm të vendit tonë, por edhe ata të Britanisë së Madhe.
