Kryeministri Edi Rama ka thënë se shtetasit rusë janë të mirëpritur në Shqipëri. Gjatë një konference për mediat pas mbledhjes së qeverisë, Rama deklaroi se rusët që largohen nga vendi pasi nuk duan të shkojnë në luftë, janë të mirëpritur në vendin tonë.
Qindra mijëra shtetas rusë raportohet se janë larguar nga vendi, pasi presidenti Vladimir Putin shpalli mobilizim të pjesshëm që detyron rekrutët të shkojnë në front në luftën që Rusia nisi më 24 shkurt në Ukrainë.
Në një kohë që të rinjtë shqiptarë po largohen me gomone drejt Britanisë së Madhe duke rrezikuar jetën, kryeministri ynë duket më i shqetësuar për fatin e rusëve që duan t’i ikin luftës sesa të përmirësojë cilësinë e jetesës në Shqipëri duke krijuar mundësi punësimi për të rinjtë.
