1820 kg marijuanë e sekuestruar një natë më parë në brigjet e komunës së Fanos nga një gomone që vinte nga Shqipëria është ngarkesa më e madhe me lëndë narkotike e kapur deri më tani në këtë territor, sipas Prokurorisë së Pesanos.
Kjo sasi do të vlente në treg nga 6 deri në 18 milionë euro.
Në konferencën e shtypit të mbajtur gjatë ditës së sotme, autoritetet italiane kanë deklaruar se disa nga 5 shtetasit shqiptarë të arrestuar gjatë këtij operacioni janë rezidentë të rregullt prej vitesh në territorin italian, madje dhe sipërmarrës të shoqërive të vogla ndërtimi.
Hetimet e këtij operacioni kanë nisur më vitin 2014 pasi në brigjet e këtij territori ashtu si dhe në janar të këtij viti në plazhet e Civitanova Marche, Porto Recanati e Porto Potenza Picena, Marzocca e Senigallia janë gjetur pako marijuanë të dala nga deti për shkak të humbjes së ngarkesës gjatë transportit. Prej këtij momenti policia italiane ka mbajtur nën kontroll territorin deri në sukesin e operacionit të një nate më parë.
Gjatë konferencës për shtyp autoritetet italiane theksuan se ngarkesa e marijuanës ishte e konfeksionuar në pako të mbyllura me celofan e mbi çdo pako është shënuar një shenjë që korrespondon me emrin e qytetit italian ku do të transportohej më pas. Shenja të tilla të orientojnë drejt qyteteve si Bolonja, Verona etj.
Sipas policisë italiane organizata kriminale pjesë e të cilës janë dhe 5 shqiptarët e arrestuar është e organizuar mirë dhe e pajisur me instrumente për t’i shpëtuar përgjimit të forcave të rendit. Gjatë operacionit janë sekuestruar instrumente laser e zhurmues frekuence.
