Nënkryetari i LSI-së, Petrit Vasili ka kritikuar kryeministrin e vendit Edi Ramën, ndërsa thotë se edhe pse grabit çdo ditë miliarda koncesione, vijon të flasë për fondin e “Shqipërisë solidare”.
Përmes një postimi në Facebook, Vasili shkruan se kjo është një formë dhe strategji e re e tij për aplikimin dhe vjeljen e taksave të reja pas tërmeteve të 21 shtatorit, ku disa shtëpi u dëmtuan në Durrës dhe Tiranë.
“Shqipëria solidare”, apo “Sevapi me pahir”, një taksë e re e kryeministrit hipokrit! Kryeministri e uli tatimin mbi dividentin nga 15% ne 8% duke shkelur në mënyrën më skandaloze kushtetutën.
Ky që i fali pra jo pak po 7% oligarkëve shet sot një taksë të re Shqipërinë Solidare apo thënë ndryshe “Sevapi me pahir”!
Po ky kryeministër, që grabit përditë miliarda me koncesione dhe që përgjysmon tatimin mbi dividentin, bile edhe me fuqi prapavepruese, na flet për Shqipërinë e ashtuquajtur solidare ndryshe “Sevapi me pahir”.
Ky është një turp kolosal i një kryeministri grabitqar që ka zbrazur arkën e shtetit me lloj lloj grabitjesh koncesionesh,tenderash rrugësh etj etj dhe tani në panik s’di ç’bën e flet. është kaq i marrë ky sa thotë që Shqiperia Solidare nuk është takse e re dhe tre rreshta më poshtë thotë do të jetë 2% mbi dividentin.
Ky në rastin më të mirë është një i çmendur dhe në rastin më të keq është një grabitqar i pangopur. Lexojeni vetë se ç’tha dje ky Edi Rama: “Ideja bazë e këtij fondi nuk është një taksë plus që shkon në buxhetin e shtetit por mekanizëm bashkëpunimi, mes qeverisë dhe biznesit të madh, apo më saktë, qeverisë dhe sipërmarrësve të mëdhenj.
Ideja është që të biem dakord për vendosjen e një bazë të sipërme, secilit prej jush ti bjerë një barrë e barabartë për këtë mekanizëm solidariteti, 2% mbi dividendin, jo kompanisë, por dividendin tuaj.”
