Ambasadori i Francës në Serbi, Jean Louis Falconi ka reaguar lidhur me veton e Emmanuel Macron për të mos hapur negociatat me Shqipërinë dhe Maqedoninë e Veriut.
Falconi ka deklaruar në intervistën e dhënë për agjencinë “Fonet” se dy vendeve të Ballkanit Perëndimor nuk u është thënë “Jo”, por sipas tij u është thënë “Po, por” dhe “Po, nëse”, çfarë lë të kuptohet se Franca është e hapur ndaj dy shteteve në fjalë nëse përmbushin kriteret e kërkuara.
Sipas tij, nuk ka një vendim të marrë më 18 tetor, sepse përkundër përpjekjeve të konsiderueshme të bëra nga këto vende, përfshirë përfundimin e Marrëveshjes së Prespës, ato duhet të zbatojnë disa reforma.
“Maqedonisë së Veriut dhe Shqipërisë nuk i është thënë “jo” në Bruksel dhe nuk kanë marrë një përgjigje negative për fillimin e negociatave. Në Bruksel, Shkupit dhe Tiranës iu tha “po, por” dhe “po nëse”, ka deklaruar Falconi, duke shtuar se fillimi i negociatave do të pasojë menjëherë pasi këto vende të kenë përfunduar reformat e nevojshme.
