Prej kohësh vendi ynë renditet në listën gri sa i përket rrezikut për pastrim parash dhe kjo tregon një nivel të lartë abuzimi. Lidhur me këtë çështje ka reaguar sot drejtori i Çështjeve Ndërkombëtare të Narkotikëve dhe Zbatimit të Ligjit në Ambasadën Amerikane, Benjamin Rockwell, i cili ka cilësuar si mjaft shqetësues fenomenin e pastrimit të parave në Shqipëri. Gjatë një aktiviteti të organizuar nga Ambasada Amerikane, Rockwell, u shpreh se pozicionimi në listën gri i Shqipërisë sa i përket pastrimit të parave është një shenjë turpi për vendin.
“Kemi parë goditje të mëdha nga SPAK dhe agjenci të tjera ligjzbatuese, të cilat po bëhen të përjavshme, por fakti se Shqipëria mbetet në listën gri në luftën kundër pastrimit të parave, është një shenjë turpi për vendin. E cila ngre pikëpyetje kredibiliteti për luftën kundër korrupsionit dhe krimit të organizuar. Shfaq një pozicion parandalues në investimet ndërkombëtare dhe rritjen ekonomike dhe sigurisht, kur ka një impakt kaq të madh në shoqëri, është një problem i madh i shoqërisë”, tha Rockwell.
Në këtë kuadër, zyrtari amerikan i ka kërkuar qeverisë shqiptare që të bëjë më shumë kujdes me amnistinë fiskale.
