Nga Arben Llalla
Zgjedhja e Kryeprokurores së Përkohshme ose ushtruese e detyrës së Kryeprokurorit të Shqipërisë, zonjës Arta Marku është një lojë e ndyrë e politikës mafioze shqiptare. Nëse gjërat do shihen me vëmendje PS dhe PD vazhdojnë lojën për të mbajtur ende shqiptarët në diktaturë demokratike. Pas vitit 1990 në Shqipëri nuk ka patur demokrat dhe socialist, por komunistë të hershëm dhe neokomunistë të rinj që dora e PPSH-së i ka ledhatuar, kur ishin fatosa, pionierë e të rinj. Vështrimet historike na e tregojnë këtë, sepse si PS apo PD janë të njëjtët bijtë e bijve komunistë, vetëm sa ndërrojnë vendet opozitë me pozitë. Herë na udhëheqin komunistët injorantë e herë komunistët intelektualë. Ne bëjmë sikur si njohim, por edhe ata bëjnë sikur kanë harruar betimin e kuq mbi ideologjinë sllave me yllin me pesë cepa që i ka qëndruar shqiponjës mbi krye për rreth 45 vite. Në Shqipërinë e sotme mund të protestohet vetëm për çështje politike, por asnjëherë për çështjet ekonomike dhe kombëtare. Ai popull që i këndon trimërisë, historisë me shpatë në dorë prej 1945 e këtej, asnjëherë nuk ka protestuar për varfërinë ekonomike dhe çështjet kombëtare.
Por, çfarë strategjie mund të përdorin dy partitë e mëdha PS dhe PD, të cilat kanë bërë një marrëveshje të fshehtë në vitin 2010, pasi në skenë më 2009 hyri LSI si forcë përcaktuese e qeverisë. PD ka mundësi të djegë mandatet në janar-shkurt dhe nga marsi ose prilli të shpallen zgjedhjet e parakohshme, kështu kryeprokurori juridik për të vazhduar vetting-un mbetet pa u votuar, pa u zgjedhur. Kryeprokurorja e sapo zgjedhur Arta Marku do mbesë në detyrë veç ushtruese, pa fuqi zbatuese dhe dosjet vjetërsohen, ligjet i amnistojnë, me një fjalë çdo gjë harrohet. Pra, mendoni se çdo gjë është rastësi? E zgjodhën zonjën Marku me disa defekte në karrierën e saj, të dobët në këtë këndvështrim që ta shkarkojnë kur të duan.
Viti 2018 do jetë me shumë probleme të thella për disa vende të Ballkanit, por edhe në Europë e më gjerë. SHBA nuk do e ketë mendjen për të vazhduar misionin për të diktuar drejtësinë e vetting-ut në Shqipëri, por do të përqendrohen diku larg Ballkanit, ku rrezikohet nisja e një lufte frontale të rrezikshme. Prandaj, çdo gjë mund të ndodhë me vetting-un, demokracinë, djegien e mandateve të PD, zgjedhjet e parakohshme dhe largimin me valixhe të Edi Ramës për t’ja lënë stafetën nuk dihet se kujt. Çdo gjë kuptohet, nëse i bëjmë një rikthim ngjarjeve historike se si Rama i fali pa zhurmë Lul Bashës Bashkinë e Tiranës, marrëveshjen e 18 majit për t’ia ngulur partive të vogla. Qimja në sy të PS dhe PD është LSI, e cila u fuqizua këto tetë vjetët e fundit, ndërsa qimja në sy të Greqisë është PDIU që mban peshën e çështjeve kombëtare, për të cilat shqiptarët kanë aq shumë nevojë.
E ardhmja e politikave të brendshme të disa vendeve të Ballkanit është në rrezik, pasi kanë një demokraci të shtirur, ekonomi të brishtë dhe gjithnjë janë nën presionin e politikës ruse për t’i patur nën ndikimin e saj, sepse humbi ekskluzivitetin në fillim të viteve ‘90. Këtu bën pjesë Shqipëria bashkë me Kuvendin e saj tashmë të tymosur.
