Nga Basir Çollaku – Një kilogramë qepë, këto ditë ka kaluar naftën e benzinën, duke kapur çmimin e rreth 2 dollarëve. Të thatat, se të njomat janë dyfish në çmim për kilogramë. Minierë, mineralesh të çmuara, në një ekonomi të shpartalluar me regji pushteti.
Nëse do të ishte prodhim vendi, e përfitues sado disi të kripura janë çmimet do të ishin bujqit tanë, blerësit do e bënin me sforco kabull e do e blinin. Se fundja produkt guzhine është xhanëm. Apo nuk jemi kthyer në një mëngjesore të madh gjithë vendi, ku kërcasin byrektoret me qepë e gjize, si dorë e parë konsumi. Hall portofoli tjetër edhe ky.
Ndërsa fermerët tanë po i hedhin prodhimet kanaleve, sepse nuk po i shesin dot, as në tregun vendas, lërë pastaj eksporte në vende të huaja, as mbështetje kanë nga hyqymeti, as kostot nuk po i nxjerrin. Por tregu fluturon me produkte adresa e të cilëve zor të shihet nën lëkurë.
Pyes një shitës nga vijnë këto të uruara qepë, me kaq hijeshi në etiketa çmimesh. Eh nga dyqanet e mëdha të qeverisë, shoqni e zgjeruar më përgjigjet. Më duket se nga Egjipti më tha. Nuk janë vendi, çdo gjë nga jashtë e a marrim.
Greke, italiane, kineze, serbe, maqedonase, vendet arabe. Mall vendi, shqiptar, bëhet gjithnjë e më e vështirë të gjesh në tregje shumice e pakice. Ia kë[pusin kot medemek bio. Mall vendi. Varja. Në porte mbijnë të gjitha. Kjo dramë falimenti ndodh në një vend ku klima, toka, kushtet, mundësojnë më tepër se një prodhim në vit. Madje në fushën e Myzeqesë tre deri në katër të tilla.
Vrafërimi masiv, pushtimi ekonomisë nga një dorë njerëz, ka prodhuar vetë,m konsumatorë vendi e jo mall bujqësor e industrial vendi. Shumë prej zengjinëve të rinj, prodhuar nga korrupsioni vrasës i pushtetit, bëjnë pazar për harxhe javore e mujore jashtë vendit.
Kjo elitë karagjozë me mendje në stomak e stomakun në kokë aq di, e aq bën. Por ne kemi halle më të mëdha se qepa. Sepse ne bëjmë politike gjithë ditën, shahemi me libër shpie për udhëheqësit e partive, turremi të shohim se mos largqoftë na ka ikur batuta e fundit e big brother, hedhim sytë përpjetë kullave shumëkatëshe, e bëjmë llogaritë e tyre të fortëve, se sa mafioze të zot janë.
Aty fluturon pastaj nga 3 mijë deri në dyshifrorë mijë euro, çmimi për metër katror të banesës e njësive tregtare, dyqaneve, parkingjeve. Këto kulla, janë qepët e pushtetit, prodhohen në vend nga para jo tërësisht vendi. Natyrisht edhe këta nuk preken. Sigurisht edhe këtu ka të thata e të njoma. Plotësisht jo sekret edhe këto janë thuajse krejt të huaja.
Nga ti duash, Italia USA, Arabia (porti), offshore. Ngado. Bujqësia është në kujtesën e këtyre zyrtarëve thjesht për të mbajtur në mendje emërtesën vjen nga fshati, duke shfarosur ndihmën për të mbështetur ata që ende mendojnë se me punë edhe bëhet diçka. Qepa është dekonspirimi se çfarë prodhohet nga zyrat tona publike. Në këto zyra teorikisht shtetërore, kryesojnë e gjallojnë pa pushim ryshfeti, babëzia, marrëzia, hajnia, plaçkitja, plehërishtja, kuplaraja, krimi, bandat, mafia, para-pastrimi, ligj-shkelja, paaftësia, kontrabanda, mosndëshkimi, e mjaft mëkate dhe poshtërsi të shumta.Strategjia e boshtaisjes së shqipërisë nga shqiptarët, po zhbën kombin.
Më shumë se gjysma kanë ikur, janë larguar, janë detyruar të zhduken duke pamundësuar jetesën gjithnjë e më tepër, e stërrosur çdo gjë dikur afërsisht normale në këtë vend. Pasi krijoi marketin e tij Edi rama caktoi shitësit qeveritarë, të cilët vënë çmimet për produktet e shportës dhe më tej, duke qenë ai oligarku me mbi 2 milionë konsumatorë.
Të cilët ankohen për qepët e groshët në facebook, por nuk hedhin ujin trupor pëprjetë në rebelim e revoltë, tia bëjnë sallatë qepët para zyrës së qeverisë, cilitdo ministër e kryeministër. Kemi ngecur në hullinë e qeverisë qepës, qytetarit, një shesh 3Q, ku e ndërron sipas rastit, atë qepën.Nesër do ankohemi për lakrat, preshin, kungujt, bamjet, patatet, hithrat, groshët.
Për bananet jo. Ata jo. Se ata janë gjithmonë të shoqëruara me qepë qeveritare, qepë pasanikësh, ndryshe i thonë, me kokainë.
E keni parë atë kompaninë BanaKing, sjell rregullisht të dyja dhe se trazojnë farë, A-SPAK… Kështu do shkojë nëse nuk ndajmë mendjen të stabilizojmë destabilitetin, pa qeni qepën të hajë…
