Përfaqësuesja Shpresa është mundur sot në ndeshjen përballë Republikës Çeke me shifrat 0-1, në një duel të vendosur nga autogoli i mbrojtësit Kalaj në pjesën e parë. Kuqezinjtë e vegjël pësojnë humbjen e tretë radhazi në Grupin G. Sfida u vendos nga një autogol kur në minutën e 35′ mbrojtësi Serxhio Kalaj u tregua i pavëmendshëm dhe devijoi topin në portën e tij me portierin Simoni i cili nuk pati asnjë shans për të reaguar.
Pas kësaj disfate, kuqezinjtë renditen të katërt në Grupin G me nëntë pikë pas shtatë ndeshjeve të luajtura, ndërsa Çekia ruan kryesimin me 16 pikë. Kjo humbje vështirëson objektivin e kuqezinjve të Bushit për ta mbyllur grupin në vendin e dytë, në një grup ku bëjnë pjesë edhe Anglia, Sllovenia, Kosova dhe Andorra.
