Ndeshjet e gjashtë prej grupeve të Europa League, që filluan në 19:00 të mbrëmjes kanë prodhuar rezultate interesante, madje ndonjë prej tyre edhe të një rëndësie të veçantë. Inter ka fituar mundimshëm ndaj Sauthempton, minimalisht 1-0 dhe merr tre pikët e para në Grupin K, por ndërkohë që është zgjatur automatikisht edhe qëndrimi i trajnerit De Bor në Milano. Shtypi Italian kishte deklaruar gjatë të gjithë ditës, se në rast të një tjetër takimi pa fitore, trajneri holandez me shumë mundësi do të gdhihej në një i papunë.
Por edhe ndaj Sauthempton, gjithçka u komplikua, sepse pas golit të Kandrevas në të 67’, dhjetë minuta më pas, Brozoviç bën një ndërhyrje fare të panevojshme në mesfushë dhe e lë skuadrën e tij me një futbollistë më pak, duke ia shtuar vuajtjet.
Karabak i Agollit ka fituar pastër 2-0 ndaj nënkampionëve të Greqisë, PAOK Selanik dhe pikërisht me këta të fundit do të diskutojë kualifikimin në fazën tjetër. Mbrojtësi i Kombëtares tonë luajti gjatë të gjithë takimit, duke e ndihmuar shumë ekipin e tij përballë një kundërshtari mjaft të vështirë.
