Nënkryetari i Kuvendit, Shpëtim Idrizi ka bërë një koment në rrjetet sociale në lidhje me kërcënimet e ministrit të Mbrojtjes, Panos Kamenos dhe paradoksin e këtyre deklaratave përballë paqes që kërkojnë të rënët shqiptarë nga genocidi grek, të cilët prehen fare afër, në Kllogjer.
Më poshtë shënimi i Shpëtim Idrizit:
Më bëri përshtypje dy ditë më parë, teksa pashë ministrin e Mbrojtjes së Greqisë, Panos Kamenos (agronom) të veshur ushtarak si gjeneral lufte që kërcënonte Shqipërinë një kilometër larg kufirit zyrtar mes dy vendeve.
Nuk u grisha aspak të komentoj deklaratat e tij, sepse një politikan i profesionit e di sa qesharake tingëllojnë ato.
Por, m’u shfaqën përpara të rënët e genocidit të Çamërisë, një pjesë e të cilëve prehen në Kllogjer, vetëm një kilometër brenda kufirit zyrtar të Shqipërisë.
Sa e çuditshme është; një kilometër brenda Greqisë bëhet thirrje për luftë, një kilometer brenda Shqipërisë ka vetëm një kërkesë që të rënët tanë të prehen në paqe.
Këta janë shqiptarët e Çamërisë, të cilët kërkojnë me ngulm paqen prej 72 vjetësh, ndërsa grekët kërkojnë luftën dhe madje e lartësojnë atë ende me një ligj absurd.
Thjesht, po ju përcjell këtë filmim të bërë në 29 qershorin e këtij viti në përkujtim të të rënëve tanë, fëmijë, gra, pleq, të cilët u vranë, u torturuan, u përzunë, vetëm se kishin një faj; ishin shqiptarë.
Kjo është vendprehja e tre mijë shqiptarëve të Çamërisë, një arsye e fortë përballë duarve “të forta” të Greqisë!
