Në gjatë një interviste në “5 pyetje nga Babaramo”, në Report TV, kryetari i PDIU-së, Shpëtim Idrizi deklaroi se opozita duhet të jetë më e qartë në ofertën e saj.
Ai tha se në momentin që mbaroi ultimatumi i studentëve për qeverinë, opozita duhet të dilte me një qëndrim të fortë.
Shpëtim Idrizi u shpreh që vendi duhet të shkojë në zgjedhje të parakohshme për të gjetur një zgjidhje politike.
“Mendoj se Shqipëria ka nevojë për zgjedhje të përgjithshme për të mos i lodhur shqiptarët dy herë. Pse jo për efekt të kostos, bashkë me zgjedhjet vendore. Njerëzve që u është vrarë dhe fyer dinjiteti do të vinte një ditë që do të reagonin. Reagimi i studentëve, ishte i të gjithë shoqërisë shqiptare.
Kjo qeveri ka ikur në drejtim të paditur, nuk ka asnjë lloj ideje për ekonominë. Shqiptarët duan që të ikin nga ky vend. Shqiptarët paguajnë 37% të të ardhurave të tyre taksa. Padyshim vendi duhet të kalojë në zgjedhje të parakohshme për të gjetur një zgjidhje politike. I gjithë sistemi ka nevojë të rishihet, jo të hiqen ca njerëz dhe të vihen ca të tjerë.”
Por, Idrizi ishte kritik dhe me sjelljen e sotme të opozitës:
“Rrallë mblidhemi… nuk është se jemi opozitë që funksionon. Merren vendime nga PD, Basha është lideri i partisë më të madhe. Opozita duhet t’i jepte ultimatum qeverisë për studentët, kur përfundoi ultimatumi i tyre. Djegia e mandateve? Kjo opozitë duhet të jetë më e qartë se çfarë kërkon. Opozita sot është shumë vonë që të kërkonte zgjedhje të parakohshme. Të dilte me një ofertë të qartë për shqiptarët, jo thjeshtë ndërroni këta.”
