Ndeshja mes Burnley dhe Watford në Premier League, planifikuar këtë të mërkurë është shtyrë për shkak të një shpërthimi të Covid brenda skuadrës së miqve.
Klubi vendas, Burnley nxorri njoftimin e shtyrjes së takimit dy orë para nisjes së ndeshjes. Federata Angleze tha se Watford kishte “një numër të pamjaftueshëm lojtarësh të ekipit të parë në dispozicion për të përmbushur ndeshjen”.
Njoftimi shtoi se vendimi u mor “me keqardhje” dhe kërkoi falje tifozëve. “Premier League e kupton se ky vendim do të zhgënjejë dhe irritojë tifozët që do të merrnin pjesë në ndeshjen e kësaj mbremje”, thuhet në deklaratë.
Kjo është ndeshja e tretë e Premier League në javën e fundit që është anuluar për shkak të shpërthimeve të Covid-it pas asaj mes Tottenhamit ndaj Brighton të dielën dhe ndeshjes në shtëpi të Brentfordit me Manchester United të martën.
“Në shqyrtimin e çdo aplikimi për shtyrje, bordi merr në konsideratë një sërë faktorësh sportivë dhe mjekësorë. Çdo vendim merret rast pas rasti me rëndësinë më të madhe për shëndetin e secilit. Në dritën e rritjes së fundit të rasteve të Covid-19 në të gjithë vendin, Premier League ka rifutur masat e urgjencës. Këto përfshijnë protokolle të tilla si testimi më i shpeshtë, maskat në ambiente të mbyllura, respektimi i distancës sociale dhe kufizimi i kohës së trajnimeve”, deklaroi Federata Angleze.
