Keqmenaxhimi i taksave të qytetarëve nga Bashkia e Tiranës vijon pothuajse në çdo procedurë tenderimi. Institucioni që drejtohet nga Erion Veliaj, nuk ka zhgënjyer edhe në prokurimin e radhës ku përveçse shpenzon miliona lekë për shërbime që mund të kushtojnë shumë më pak, procedurat zhvillohen në shkelje të rregullave të prokurimit publik. Gijotina.com e ngriti si shqetësim që para dy javësh këtë tender, pasi Veliaj edhe fenelinat e policisë së tij i blen me shifra marramendëse.
Këtë herë Bashkia e Tiranës ka mbyllur tenderin i cili ishte shpallur në datën 15 Prill 2022, për blerje fenelinash për Policinë Bashkiake. Ky tender mban numrin e referencës REF-25386-04-14-2022 dhe ka fondin limit rreth 2 070 833 lekë të reja, ose rreth 21 milionë lekë të vjetra. Pra, Erion Veliaj do të shpenzojë për 21 milionë lekë të vjetra për të blerë fenelinat e policisë që terrorizon hallexhinjtë që shesin në rrugët e Tiranës, ndërkohë që nëse i referohemi çmimit të tregut këto kushtojnë shumë më pak. Mjaftojmë të bëjmë një kërkim të thjesht në internet për fenelina dhe shohim që më e shtrenjta kushton 1400 lekë të reja, ose 14 mijë lekë të vjetra.
Përpos shumës së lartë që ka vënë për një shërbim që kushton shumë më pak, Lali Eri edhe prokurimin e ka bërë në mënyrë jo të rregullt. E kthyer tashmë në një “traditë”, edhe ky tender është bërë pa garë, pra me vetëm një kompani. Kompania që ka marrë pjesë është “VILNIK MOTORS” sh.p.k, e cila edhe pse s’ka pasur konkurrent, është shpallur fituese. Siç e dimë tashmë këto procedura lënë dyshime se fituesi është i paracaktuar, për këtë tenderi është futur nga “Open Data” në kategorinë e flamurit të kuq me mbishkrimin e mungesës së konkurrencës.
Në fakt dyshimet nuk ekzistojnë kur bëhet fjalë për Bashkinë e Lali Erit, i cili shpenzimet e kota që bën nga taksat e qytetarëve nuk kanë fund. Të shpresojmë që një ditë fenelinat që simbolizojnë tmerrin e gjysheve që shesin në rrugë, hallexhinjve që mbledhin kanoçe dhe hekurishte për të nxjerr bukën e gojës dhe qytetarëve që nuk gjejnë dot parkim nga ndërtimet e Veliajt, një ditë të kthehen në simbol të arrestimit të tij për abuzimet që bën/ Marrë nga Gijotina.com/
