Tre gjuetarë shpendësh janë gjobitur sot nga policia në Shkodër.
Bëhet fjalë për personat e identifikuar me iniciale R. M., 29 vjeç, banues në fshatin Dajç, E. M., 37 vjeç, banues në fshatin Berdicë e Sipërme dhe S. M., 30 vjeç, banues në fshatin Berdicë, Shkodër.
Gjatë kontrollit të ushtruar nga shërbimet e Komisariatit të Policisë Shkodër, në fshatin Pentar, Shkodër, janë konstatuar personat e lartpërmendur, duke gjuajtur shpendë, jashtë periudhës së përcaktuar me ligj.
Gjithashtu, këta 3 persona janë ndëshkuar me masë administrative 50.000 të rinj secili, për shkelje të ligjit nr.61/2016 “Për shpalljen e Moratoriumit të Gjuetisë në RSH”, ligjit nr. 74/2014 “Për Armët” dhe ligjit nr. 10253 date 11.03.2010 “Për gjuetinë”.
Në vijim të veprimeve u bë bllokimi i 2 armëve të gjahut që përdornin këta shtetas, për gjueti.
Materialet iu referuan Prokurorisë pranë Gjykatës së Rrethit Gjyqësor Shkodër, për veprime të mëtejshme.
