Abuzimet me donacionet, abuzimet me tenderat dhe blerje pa fatura tatimore janë disa prej shkeljeve ligjore të konstatuara nga një auditim i kryer nga Ministria e Financave në Ambasadën tonë në Turqi vitin e shkuar.
Sipas raportit të Ministrisë, Ambasada Shqiptare në Ankara nuk ka menaxhuar me përgjegjshmëri fondet nga sponsorizimet e donatorëve të ndryshëm për festën kombëtare dhe për Qendrën e Kulturës Shqiptare në Ankara për këto tre vite.
Gjithashtu, nuk janë zbatuar procedurat ligjore dhe nënligjore në fuqi në fushën e prokurimit publik për blerjet për mallra, shërbime apo punë të ndryshme. Pagesat janë kryer kryesisht me arkë dhe pjesërisht me bankë, ndërkohë që në mandat pagesat e arkës nuk ka nënshkruar personi që ka tërhequr paratë.
Auditi i Ministrisë së Financave thekson se janë përdorur fondet e sponsorizimeve për nevoja të Ambasadës, jashtë destinacionit të sponsorizimeve dhe pa miratim të Ministrisë së Punëve të Jashtme.
