Policia spanjolle ka bërë me dije se ka shkatërruar një rrjet shqiptaro-bullgar të trafikut të heroinës dhe drogave të tjera.
Droga kalonte nga Turqia përmes Ballkanit dhe mbërrinte në qytetet e Barcelonës dhe Tarragonës.
Në pranga janë vënë 7 persona të cilëve iu është sekuestruar në një laborator të sofistikuar për përpunimin e drogës, 38 kg heroinë të pastër, 8 kg kokainë, 50 kg kimikate dhe një armë me silenciator.
Guardia Civil në një deklaratë për mediat ka bërë me dije se, “anëtarët e rrjetit kishin përgatitje ushtarake dhe vepronin me një disiplinë të rreptë”.
Grupi tërhoqi vëmendjen e autoriteteve spanjolle, të cilat bashkëpunuan me autoritetet shqiptare pasi konfiskuan dokumentet e trafikantëve në një operacion të mëhershëm.
Sipas burimeve, grupi udhëhiqej nga një shtetas shqiptar me një histori të gjatë kriminale, ndaj dhe u vu nën mbikëqyrje. Autoritetet iberike shtojnë se, shtetasit shqiptarë e trafikonin drogën, ndërsa operacionet e shpërndarjes i merrte përsipër pjesa bullgare e rrjetit.
