Presidenti Ilir Meta është thirrur sërish sot nga Komisioni i Ligjeve për të dhënë shpjegimet e tij në lidhje me kerkesen e maxhorancës për ta shkarkuar nga detyra.
Ndërkohë kreu i shtetit ka kërkuar që të paraqesë argumentet e tij, në datën 10 maj, por mazhoranca në kushtet e skadimit të afatit të ngritjes së një Komisioni Hetimor, kërkoi që Presidenti të paraqitet ditën e sotme në orën 11:00.
Sipas maxhorancës “Presidenti ka kryer sjellje dhe veprime të cilat kanë nxitur dhunë, nuk e kanë moderuar konfliktin politik përkundrazi e kanë acaruar atë duke nxitur militantë dhe duke terrorizuar qytetarë, duke kufizuar lirinë e lëvizjes së njerëzve dhe lirinë personale të tyre.”
Për këtë ka pasur edhe një reagim nga Presidenca, ku përmes një shkrese dërguar Kuvendit nga drejtori i Kabinetit të Presidenti Ilir Meta, Edmond Panariti, është deklaruar se nuk u është komunikuar qartë arsyeja se përse mbahet mbledhja e Komisionit të Ligjeve apo se çfarë kërkohet nga ky Komision prej Presidentit.
