Ish-deputeti i PD, Agron Shehaj kërkon të nisen hetimet në lidhje me biznesmenin Sinan Idrizi, aksioner i Air Albania për mashtrimin financiar si pasojë e një denoncimi të bërë nga biznesmeni turk Adnan Polat.
Përmes një postimi në Facebook, Shehaj hodhi dyshime për mënyrë se si Idrizi, nga një person i panjohur, u bë ortak i shtetit në kompaninë e fluturimeve Air Albania.
“Sinan Idrizi, një person që Edi Rama e vendosi si ortak me 41 % të aksioneve të kompanisë shtetërore Air Albania, akuzohet për mashtrim prej miliona euro. Këtë të akuzuar për mashtrim, pa asnjë aktivitet biznesi, pa asnjë burim të deklaruar parash, Edi Rama e bëri ortak me shtetin vetëm sepse ai ishte njeriu i duhur për të mbuluar Edi Ramën. Nuk ka asnjë dyshim që Sinan idrizi u vu aty vetëm për të shërbyer si mbulesë për vetë Edi Ramën. 41 % të aksioneve të Air Albania janë të Edi Ramës. Është koha që SPAK të hetoj urgjentisht lidhjet Rama-Idrizi dhe mënyrën se si u bë Idrizi ortak i shtetit.”-shkruan Shehaj.
