Presidenti amerikan Donald Trump, përmes një mesazhi në “Twitter pranoi se po hetohet për shkarkimin e ish-drejtorit të FBI-së, James Comey, në kuadër të hetimit më të gjerë për ndërhyrjen ruse në zgjedhje.
Trump njoftoi për këtë zhvillim të ri, ndërsa akuzoi zëvendësprokurorin e Përgjithshëm për “gjueti shtrigash”.
“Po hetohem për shkarkimin e drejtorit të FBI-së, nga njeriu që më tha të shkarkoj drejtorin e FBI-së”, shkruan Trump.
Ky njeri është pikërisht zv.prokurori i Përgjithëshëm, Rod Rosenstein, i cili shkroi një memorandum ku kritikonte Comeyn, gjë që u përdor si justifikim nga Shtëpia e Bardhë.
Rosenstein mori përsipër hetimin për Rusinë pas shkarkimit të Comeyt dhe më pas ia kaloi atë prokurorit special, Robert Mueller, i thirrur enkas për këtë hetim.
