SHBA është goditur nga stuhi të fuqishme në dy ditët e fundit, duke vrarë rreth 20 njerëz dhe duke shkaktuar dëme të mëdha materiale. Erërat e forta dhe shirat të hënën goditën rajonet në brigjet e Oqeanit Atlantik, pasi një tornado rrafshoi një park me shtëpi portative në shtetin jugor të Xhorxhias.
Tornadot goditën edhe rajone të Misisipit, Luizianës dhe Karolinës Jugore. Ndërsa gjatë fundjavës, Kalifornia u godit nga stuhia e tretë më e fuqishme e shiut brenda këtij muaji.
Një park në Albany të Xhorxhias kishte më shumë se 200 shtëpi portative. Pothuajse të gjitha janë shkatërruar nga tornadot. Ekipet e shpëtimit po kontrollojnë rrënojat për të parë për njerëz që mund të jenë bllokuar brenda tyre, ndërsa banorët bëjnë vlerësimin e dëmeve.
Xhorxhia shpalli gjendjen e jashtëzakonshme. Kërkimet për personat e zhdukur, mes tyre një vajzë dy vjeçare të cilën e kapi stuhia,po vazhdojnë. Zyrtarët thonë se stuhia ishte më e rëndë sesa ajo që fillimisht raportoi media.
