Ish-kryenegociatorja e Kosovës në bisedimet me Serbinë, Edita Tahiri ka reaguar lidhur me shpalljen “NON GRATA” nga SHBA të ish-kryeministrit Sali Berisha, duke e futur në listën e zezë së bashku me familjen.
Përmes një statusi në Facebook, Tahiri shkruan se shkëlqimi kombëtar i Sali Berishës është i paprekshëm, duke shtuar se liderët që shkruajnë historinë e kombit mbeten në faqen e ndritshme të historisë!
Postimi i plotë
Shkëlqimi kombëtar i Sali Berishës është i paprekshëm. Ai mbetet një lider historik i kombit shqiptar sepse vuri kombin mbi të gjitha. Udhëhoqi me vizion dhe vendosmëri drejt Shqipërisë demokratike dhe Euro-atlantike dhe aleancës strategjike me Amerikën, duke bërë kthesën historike nga komunizmi në demokraci. Solli lirinë për popullin duke i dhanë fund totalitarizmit që kishte pllakosur Shqipërinë për dekada. Por mbi të gjitha Sali Berisha mbrojti dhe avancoi interesat kombëtare duke i dhënë mbështetje gjysmës tjetër të kombit të mbetur padrejtësisht nën dominimet e huaja. Njohja e hershme e pavarësisë së Kosovës, dhe mbështetja e vazhueshme për luftën tonë për liri e pavarësi ka qenë një shtylle e fortë për neve udhëheqësite e pavarësisë së Kosovës. Askush nuk mund ta cënoj atdhetarinë e Sali Berishës. Nuk ka lider pa gabime, por liderët që shkruajnë historinë e kombit mbeten në faqen e ndritshme të historisë!
