Pas një dekade diskutimesh, autoritetet lokale të Floridas në SHBA kanë aprovuar planin për lëshimin e 750 milionë mushkonjave të modifikuara gjenetikisht në natyrë, pavarësisht kundërshtimeve nga shumë vendas dhe një koalicion i grupeve të mbrojtjes së mjedisit, raporton CNN.
Ky projekt-pilot bëhet për të provuar, nëse një mushkonjë e modifikuar gjenetikisht mund të jetë një alternativë e suksesshme për spërkatjen e insekticideve.
Llojet e mushkonjave “aedes aegypti” që janë në Florida transmetojnë disa sëmundje infektive vdekjeprurëse si zika, ethet e dengos, chikungunya dhe ethet e verdha.
Por, mushkonjat nuk do të lëshohen vetëm në Florida, por nga viti 2021 do të lëshohen edhe në Teksas, thotë Oxitec, kompania britanike që ka zhvilluar mushkonjat e modifikuara gjenetikisht.
Mushkonjat e modifikuara gjenetikisht janë testuar në ishujt Kajman, Panama dhe Brazil, dhe firma ka raportuar sukses të madh, pasi në pjesën urbane të Brazilit, numri i mushkonjave ka rënë me 95%.
Grupet mjedisore shqetësohen se përhapja e gjeneve mashkullore të modifikuar gjenetikisht në natyrë mund të dëmtojë speciet e rrezikuara të shpendëve, insekteve dhe gjitarëve që ushqehen me to.
