Kryeministri i Kosovës, Albin Kurti, ka njoftuar se Korporata e Mijëvjeçarit (MÇ) ka aprovuar marrëveshjen e kompaktit për Kosovën në vlerë prej 236, 7 milionë dollarësh. Kurti ka thënë se ky do të jetë investimi më i madh energjetik që ka ndodhur në Kosovë deri sot.
“Do të ndihmojë në vendosjen e themeleve për trancizionin tonë të energjisë. Falënderime të veçanta për dy ekipet tona për punë e shkëlqyer. Miqtë, partnerët, Aleatët” – ka shkruar kryeministri Kurti.
Ka reaguar edhe ministrja Artane Rizvanolli, e cila e ka konsideruar si lajm të mrekullueshëm.
“Lajm i mrekullueshëm nga Shtetet e Bashkuara të Amerikës! Bordi i drejtorëve të Korporatës së Sfidës së Mijëvjeçarit (MÇ) kanë aprovuar Programin Kompakt të Kosovës me vlerë prej 236.7 milionë dollarësh – investimi më i madh në sektorin e energjisë të Kosovës, si dhe një gur themel që mundëson tranzicionin tonë energjetik. Jam falënderuese ndaj ekipeve të Shteteve të Bashkuara të Amerikës dhe të Kosovës, krenare me ekipin e Kosovës, si dhe e nderuar që kam udhëhequr këto negociata!”, ka shkruar ajo.
