Deputeti demokrat Enkelejd Alibeaj do të mbledhë ditën e sotme grupin parlamentar demokrat, vetëm disa orë para nisjes së sesionit të ri parlamentar.
Ndërkohë që sot në orën 18:00 pritet të nisë seanca e parë e sesionit të ri parlamentar, Alibeaj ka njoftuar deputetët e PD për një mbledhje e cila do të mbahet në orën 10:00 të ditës së sotme në zyrat e kryesisë së kuvendit.
Nga ana tjetër, një mbledhje pritet të zhvillohet dhe në selinë blu nga kreu i PD, Sali Berisha, ku prezentë pritet të jenë deputetët mbështetës të tij.
Ky sesion pritet të jetë shumë intensiv, nisur nga temat që do të diskutohen por edhe nga retorika e ashpër e Berishës dhe rikthimit të fuqishëm në politikën aktive të ish presidentit Ilir Meta. Këta të fundit kanë premtuar një vjeshtë me protesta deri në rrëzimin e qeverisë.
Nga ana tjetër, në Kuvend pritet që të shkojnë disa nisma, kryesorja ajo e socialistëve për të ndryshuar ligjin e dekriminalizimit ku të parashikohet pastrimi jo vetëm i radhëve të parlamentit, por gjithë politikës e institucioneve të pavarura nga ish-bashkëpunëtorët e Sigurimit të Shtetit. Ndër të tjera do të diskutohet edhe legalizimi i kanabisit, apo rikthimi i basteve sportive, tema që do të shkaktojnë debat.
