Ish-presidenti dhe kryetari aktual i Partisë së Lirisë, Ilir Meta ka reaguar pas trazirave në veri të Kosovës. Sipas Metës, kryeministri Edi Rama mbylli gojën ndërkohë që aleati i tij në “Ballkanin e Hapur”, Vuçiç ndërhyri përmes grupeve kriminale në Kosovë.
Meta theksoi se BE duhet që t’i tregojë Beogradit që çdo veprim për destabilizimin e rajonit do të ndëshkohet.
Meta tha se qeveria e Shqipërisë duhet të pozicionohet qartë në krah të Kosovës.
“Ngjarjet e mbrëmshme janë tregues i qartë që Serbia nuk është e interesuar të respektojë marrëveshjet ndërkombëtare dhe të ndërmjetësuara nga faktori ndërkombëtar, të firmosura në Bruksel me Kosovën, përkundrazi i bllokon ato dhe i keqpërdor maksimalisht vetëm në interes të politikave destruktive dhe destabilizuese duke u fshehur pas grupeve kriminale në Veri të Republikës së Kosovës”, tha Meta duke theksuar se Serbia mbylli kufijtë mbrëmë, kurse Rama mbylli gojën për 24 orë.
“Institucionet e Kosovës treguan pjekuri dhe mençuri që bashkëpunuan dhe pranuan këshillën e aleatëve perëndimorë, BE dhe SHBA, që për 30 ditë të shtyhen masat e reciprocitetit të kalimit të qytetarëve, mallrave dhe mjeteve motorike me Serbinë”, tha Meta.
