Sëmundja e dermatozës nodulare që ka prekur gjedhët në veri të vendit është konsideruar si një situatë serioze nga vetë Ministri i Bujqësisë Edmond Panariti.
Duke inspektuar proçesin e vaksinimit në një fernmë gjedhësh në fshatin Brenogë të rrethit Has, Panariti kritikoi edhe disa institucione që sipas tij po përpiqen të bëjnë protagonistin në këtë situatë, pasi deri më tani janë evidentuar 425 raste.
Panariti: Situata paraqitet serioze dhe kjo akoma më shumë më bën që të instistoj që masat e shpallura nga Ministria e Bujqësisë duhet të zbatohen me përpikmëri pasi përndryshe do ta kthejmë Shqipërinë në një vatër masive infeksioni. Prandaj dëshiroj t’u bëj apel edhe atyre individëve apo përfaqësuesve të institucioneve të cilët ndoshta duan të bëjnë edhe interesantin dhe protagonizmin. Por dëshiroj të theksoj se nuk luhet me zjarrin. Na lini ne që jemi autoritetet e kësaj pune, unë jam dhe veteriner para se të jem Ministër, sëbashku me Dekanin për të zbatuar ato masa të cilat do të bëjnë të mundur izolimin, trajtimin e infeksionit dhe parandalimin e tij.
Ministri i Bujqësisë tha se prej ditës së premte në mënyrë që të parandalohet infeksioni do të shpërndahen në të gjithë vendin 165 mijë doza vaksina për gjedhët.
Panariti: 165 mijë doza vaksina janë tashmë disponibël, do përfundojë proçesi i vaksinimit në mënyrë që të instalojmë imunitetin, të bllokojmë infeksionin. Pastaj vatra të izoluara, të cilat nuk lejohen të qarkullohen natyrisht kërkojnë trajtimin me asgjesimin e kafshëve dhe sigurisht kompensimi i fermerëve përkundrejt vlerës që do të dakordësohet.
Fermerët i kërkuan Ministrit Panariti mbështetje financiare për gjedhët e prekur nga kjo sëmundje, ndërsa Ministri siguroi se pas mbarimit të fazës së parë të vaksinimit do të evidentohet çdo rast dhe do shikohet mundësia e kompensimit.
