Këshilli i Mbikëqyrjes së Bankës së Shqipërisë ka vendosur që të përgjysmojë normën bazë të interesit për lekun nga 1 për qind në 0.5 për qind.
Guvernatori i Bankës së Shqipërisë, Gent Sejko tha në këtë mënyrë synohet nxitja e kreditimit në ekonomi.
Përmes këtij veprimi, BSH synon që të nxisë kredidhënien nga bankat me qëllim rritjen e sasisë së parasë që qarkullon në treg, e cila do të sjellë nxitje të kërkesës dhe konsumit.
Vendimi erdhi pas problemeve të theksuara që po shfaqen në treg për shkak të koronavirusit.
Gjithashtu Sejko tha se BSH ka vendosur që të shtyjë me tre muaj pagesat e këstëve të kredisë për familjet dhe bizneset e prekura nga kriza.
