Ministrja e Kulturës, Mirela Kumbaro dhe kryebashkiaku i Durrësit Vangjush Dako kanë raportuar sot në Komisionin për Edukim dhe Mjetet e Informimit në lidhje me projektin e shumë debatuar, “Veliera”.
Gjatë seancës dëgjimore ministrja Kumbaro u shpreh që institucioni kompetent për këtë çështje është Shërbimi Arkeologjik.
“Veliera është përcjellë në muajin shtator 2016 tek Agjencia e Shërbimit Arkeologjik (ASHA). Ndodhet në kufi mes zonës A dhe B. Durrësi është në përgjegjësi të drejtpërdrejtë tek Institucionet Publike. Institucioneve të Studimit Aerkeologjik iu vendos të ndjekin hap pas hapi të gjithë procesin”, tha Kumbaro.
Ndërsa kryebashkiaku i Durrësit Vangjush Dako tha që gërmimi do të kryhet deri në fund. Më tej ai shtoi se punimet janë të hapura dhe qëllimisht janë lënë të tilla. Sipas tij, punimet janë kryer vetëm në zonën B.
“Objekti është fundi i viteve ‘800 e ‘900, objekti është i prishur, dhe ndodhej nën objektin që është ndërtuar banka në vitet 1920. Zona që ne kemi kryer gërmimet është vetëm zona B dhe jemi larguar nga zona A”, tha Dako.
Gjithashtu ai shtoi: “... Jemi të hapur që çdo njeri të vizitojë kantierin dhe në rast se na kërkohet që këto punime janë të dëmshme, jemi gati t’i konservojmë dhe objektet t’i çojmë në muze. Ne konsiderojmë vlerë çdo lloj gërmimi që bëhet në Durrës.”
Punimet për projektin “Veliera” kanë sjellë reagime të shumta ditët e fundit si nga shoqëria civile, qytetarë, intelektualë, gazetarë, historianë dhe media të ndryshme, pasi gjatë punimeve kanë dalë në pah disa mure antike dhe disa topa të lashtë, të cilat Bashkia e Durrësit po i mbullon dhe po vijon punimet për ndërtimin e këtij projekti.
