Në prag të samitit të NATO-s, që do të zhvillohet në 8 dhe 9 korrik, në Varshavë të Polonisë, Ministrja e Mbrojtjes Mimi Kodheli, dhe Ambasadori Polak në Tiranë, Nikola Jezerski, kanë ndarë në një seminar të organizuar nga Instituti Shqiptar i Studimeve Ndërkombëtare opinionet e tyre mbi sfidat e samitit.
Jeziorski: Samiti do të vendosë rrugën e vazhdimit të bashkëpunimit politik e ushtarak. Konkluzionet duhet të jenë universal dhe të vendosura. NATO duhet të forcojë kapacitetet e saj për krizat me të cilat do të përballet.
Kodheli: Forcimi dhe modernizimi i elementëve mbrojtës të Aleancës, do të jetë në thelb të diskutimeve të Samitit. Vendet aleate do të vlerësojnë implikimet afatgjata të krizës së marrëdhënieve midis NATO-s dhe Rusisë si dhe do të konsiderohen hapat e mëtejshëm.
Ministrja Kodheli, paralajmëroi se shumë shpejt në vendin tonë do të ngrihet edhe qendra e ekslelencës së NATO-s që do të studiojë fenomenin e terrorizmit.
Kodheli: Shqipëria ka ofruar ngritjen e një Qendre Ekselence NATO që të merret me studimin e fenomenit të luftëtarëve të huaj terroristë. Ndonëse ideja u hodh në tryezat e NATO-s në një periudhë kur e gjithë vëmendja ishte përqendruar tek ngjarjet në kufijtë e Polonisë dhe vendeve Baltike, gradualisht arritëm që projektin tonë ta paraqisnim para 6 javësh përballë Komitetit Ushtarak të NATO. Tani kemi hyrë në fazën teknike të ngritjes së kësaj qendre, duke i dhënë Shqipërisë një prezencë strukturore të Aleancës.
Këtë vit, Shqipëria ndaloi trendin e rënies 7-vjeçare në shpenzimet e mbrojtjes. B uxheti i mbrojtjes për vitin 2016 ka një rritje prej 12% në terma realë, në krahasim me vitin 2015 dhe ky është një tregues se Shqipëria i qëndron besnike vendimeve të marra në Uells, për sa i përket “Zotimit mbi Investimet e Mbrojtjes”.
