Sandër Lleshaj ka organizuar këtë të martë një ceremoni për nisjen e detyrës në postin e Ministrit të Brendshëm.
Lleshaj theksoi se Policia e Shtetit është organizata që ka mbajtur barrën më të jashtëzakonshme duke cilësuar se çdo shqiptar duhet të tregojë respekt të lartë për të.
“Profesioni i policit është i bazuar tek nderi, sensi i detyrës dhe integriteti. Një sens i fortë dhe i qartë për nderin personal dhe nderin profesional për punonjësin e policisë janë pjesë thelbësore e identitetit, pjesë e ADN-së së tij. Vetëm këtë mesazh dua të theksoj sot gjatë kësaj ceremonie. Për programin tim, do të kemi kohë që të diskutojmë së shpejti. Vetëm nëpërmjet nderit dhe integritetit të lartë, Policia e Shtetit, ne, mund të gjejmë rrugën e sigurt për tek besimi i qytetarëve të këtij vendi, besim i cili është parakusht absolut për plotësimin e misionit të vështirë, që kemi marrë përsipër”, tha Lleshaj.
