Kryeministri Albin Kurti është nisur sot për në Tiranë, pasi do të marrë pjesë në samitin e liderëve të Ballkanit Perëndimor.
Megjithatë, kryeministri i Kosovës nuk ka lënë pa kujtuar një nga ngjarjet më të rëndësishme të kombit shqiptar, atë të Lidhjes së Prizrenit.
Kurti ka ndaluar këtë mëngjes në Prizren dhe ka zhvilluar homazhe për të nderuar rëndësinë e Lidhjes së Prizrenit të 10 qershorit 1878, ku shqiptarët e të gjitha trevave u bënë bashkë për të t’i dalë në mbrojtje vendit të tyre kundër copëtimit të territorit.
“Jemi nisur herët në mëngjes për në Tiranë, ku do të takohemi me udhëheqësit e shteteve të rajonit. Por sot është data e kryengjarjes së kombit tonë, përvjetori i Lidhjes që u mblodh në 10 qershor 1878 në Prizren”, ka thënë Kurti.
Në Facebook, Kurti tha se pas homazheve, kanë vazhduar pastaj për në Shqipëri.
“Ishte e domosdoshme të ndaleshim në Prizren për ta nderuar Lidhjen e veprimtarët e saj, gegë e toskë e të të gjitha bindjeve politike e feve, që vendosën të bëhen bashkë për mbrojtjen e njerëzve e trojeve të Atdheut. Pas homazheve, vijuam rrugën për në Shqipëri, duke e patur përherë të qartë se cila është busulla jonë historike, ajo që na e tregon udhën e mbarë”, tha kryeministri i Kosovës.
Sot në Pallatin e Brigadave në Tiranë zhvillohet Samiti i Krerëve të Ballkanit Perëndimor.
Agjenda e Samitit:
Në orën 09.30 – Takim Bilateral me Zoran Tegeltija, Kryetar i Këshillit të Ministrave të Bosnjës dhe Hercegovinës
Në orën 10.00 – Takim Bilateral me Olivér Várhelyi, Komisionerin Europian për Zgjerimin dhe Fqinjësinë e Mirë
Në orën 10.30 – Mbërritja e delegacioneve
Në orën 11.00 – Seanca Plenare
Në orën 12.30 – Foto Familjare
Në orën 12.30 – Konferencë për shtyp e Kryeministrit Edi Rama me Komisionerin Evropian për Zgjerimin dhe Fqinjësinë e Mirë, Olivér Várhelyi
Në orën 13.00 – Drekë Pune
Në orën 15.00 – Firmosje e marrëveshjeve
Në orën 15.15 – Ceremonia e inaugurimit të Qendrës së Informimit Kulturor.
